ಓ ಫೆಬ್ರವರಿ, ನೀನೇಕೆ ತುಂಬಾ ಕೆಂಪು ಕೆಂಪು...?

ಓ ಫೆಬ್ರವರಿ,
ನಿನ್ನ ಕಾಯುತಿದೆ
ಬಹುದಿನಗಳ ಕನಸು...

ನಡೆಯುತಲಿ ಬೀದಿಯಲಿ
ನಿನ್ನೇ ನೆನೆಯುತಿದೆ
ಕಾಣದಾ ಮನಸು...

ಉದುರಿದೆಲೆಯಲ್ಲಿ
ನಿನ್ನ ಮೊಗ ಕಂಡು
ಕಾಲೆರಡು ಮೈ ಮರೆಯುತಿವೆ...

ಸುಳಿವ ಗಾಳಿಯಲಿ
ನಿನ್ನ ನಗು ಕಂಡು
ಕಣ್ಣು ಮಿನುಗುತಿದೆ...

ಸಂಜೆಯಲಿ ರವಿ ಕೆಂಪು
ನಿನ್ನ ಕೆನ್ನೆಯ ತುಂಬ
ನವಿರಾದ ತಂಪು...

ಬಿಳಿಯ ಮೋಡಗಳೇ
ಬಳಿಬಂದು ಕೊಡುತಿಹವು
ನಿನ್ನ ಓಲೆಗಳು...

ಬಿಡಿಸಿ ನೋಡಲು ನಾನು
ಮಳೆಯ ಹನಿಗಳು ಬಿದ್ದು
ಕದ್ದು ಓಡುತಿವೆ...

ಮುಸ್ಸಂಗೆ ನನಕಂಡು
ಅಂತರಂಗದ ಬಯಕೆ
ನಡೆಯಲಿಹುದು ಎನ್ನುತಿದೆ...

ಮರೆಯ ಮೋಡದ ನಡುವೆ
ಚಂದಿರನ ಕಂಡು
ಮನಸು ಕಾಡುತಿದೆ...

ಓ ಫೆಬ್ರವರಿ,
ನೀನೇಕೆ ತುಂಬಾ

ಕೆಂಪು ಕೆಂಪು...?